Алматының туризм саласынан түскен салық түсімдері 2 есеге артты

2024 жылы Алматыда туризм саласы рекордтық өсім көрсетті, деп хабарлайды Travelpress.kz.

Бұл туралы Алматы қаласы әкімдігінің баспасөз қызметі мәлім етті. 
 
Үш тоқсан ішінде қалаға 1,7 миллион адам келді, бұл өткен жылмен салыстырғанда 14,2%-ға көп. Бұл салық түсімдерінің екі есеге — 85,5 миллиард теңгеге дейін артуына әкелді. 
 
Туризм саласына салынған инвестиция да айтарлықтай өсті — 92,9 миллиард теңге. Жеке қаражат есебінен қалада 35 жаңа орналастыру нысаны ашылды. Атап айтсақ, 20 қонақ үй, 4 глэмпинг, 8 хостел және 3 шағын қонақ үй, соның арқасында 836 бөлме қосылды. 
 
2025 жылы Алматы позициясын Орталық Азияның жетекші туристік орталығы ретінде нығайту үшін инфрақұрылымды белсенді түрде дамытып, инвесторларды тартуды жалғастырады.