Алматыдағы «Терренкурды» жаңғырту жұмыстары сәуірде аяқталады

Алматыдағы «Терренкурды» жаңғырту жұмыстары биыл аяқталады, деп хабарлайды Travelpress.kz.

Алматының Медеу ауданында қоғамдық кеңістіктерді дамыту жалғасып келеді. Қала әкімі Ерболат Досаевтың айтуынша, 2025 жылдың сәуірінде «Терренкур» аумағындағы 3,4 га жердің жаңғырту жұмыстары аяқталады. Жоба аясында тоған, демалыс аймақтары, балалар және спорт алаңдары көркейтіледі. 

Мамыр айында Достық даңғылы (Құрманғазы көшесінен Әл-Фараби даңғылына дейін) және Пушкин көшесі (Райымбек батыр даңғылынан Гоголь көшесіне дейін) кешенді түрде көркейтіледі. Жөндеу жұмыстарына жол төсемін жаңарту, велосипед жолдарын жасау, көгалдандыру, сондай-ақ серуендеуге және спортпен айналысуға арналған аймақтарды ретке келтіру кіреді.

Көктемде 60 аулада күрделі жөндеу басталып, балалар және спорт алаңдары орнатылады. Сондай-ақ, қазан айына дейін 10 зираттың аумағы көріктендіріледі: қоршаулар жаңартылып, жолдар жөнделеді, жарықтандыру мен бейнебақылау орнатылады.

2024 жылы «Халық қатысатын бюджет» бағдарламасы аясында 34 жоба іске асырылды, ал 2025 жылы тағы 34 жобаны жүзеге асыру көзделген.