ҚР-ның Халықаралық Азаматтық авиация ұйымы (ИКАО) жанындағы Тұрақты өкілі Тимур Тілегенов Америка Құрама Штаттарының ИКАО-дағы Тұрақты Өкілі Энтони Клэрмен кездесу өткізді, деп хабарлайды Travelpress.kz.
Кездесу барысында Тимур Тілегенов пен Энтони Клэр бір-бірін ИКАО-да өз елдерінің тұрақты өкілдері ретінде тағайындалуымен құттықтады. Энтони Клэр Қазақстанның Орталық Азия елдері арасында ИКАО-да алғашқы тұрақты өкілдігін ашу жөніндегі шешімін жоғары бағалады.
Өз кезегінде ИКАО жанындағы Қазақстан Республикасының Тұрақты өкілі Тимур Тілегенов әңгімелесушіні азаматтық авиация саласының ағымдағы дамуы, ұшу қауіпсіздігі мен авиациялық қауіпсіздікті арттыру бойынша жүргізіліп жатқан шаралар, әуе көлігінің қолжетімділігі, сондай-ақ ИКАО стандарттары мен ұсынылатын практикасына сәйкестік деңгейін одан әрі арттыру жөніндегі жоспарлар туралы хабардар етті.
Тараптар екі елдің азаматтық авиация саласындағы ынтымақтастығының бірқатар мәселелерін, оның ішінде Қазақстан мен АҚШ арасында тікелей әуе қатынасын белгілеуді және АҚШ-тың Федералдық авиация әкімшілігі (FAA) өкілдерінің Қазақстанға ұшу қауіпсіздігі жөніндегі халықаралық бағалауға (IASA) алдын ала техникалық шолу жүргізу үшін сапарын талқылады.
Тұлғалар екі ел арасында "ашық аспан" американдық халықаралық авиациялық саясатына сәйкес "ашық аспан" режимінде әуе қатынасы туралы күшіне енген үкіметаралық келісімнің бар екенін қанағаттанушылықпен атап өтті.
Энтони Клэр пікірінше, бұл келісім Орталық Азиядағы азаматтық авиацияны ырықтандырудағы алға жасалған қадамды білдіреді және аймақтың әлеммен байланысын кеңейтеді.
Кездесу қорытындысы бойынша өзара тиімді ынтымақтастықты жолға қою үшін екіжақты байланыстарды қолдауды жалғастыру туралы уағдаластыққа қол жеткізілді.
Есепке қою туралы № KZ200123 БАҚ куәлігі 10.12.2023 жылы берілді.
