Павлодар облысындағы Жасыбай көлінде қысқы туристік маусымның салтанатты ашылу рәсімі өтті, деп хабарлайды Travelpress.kz.
Іс-шараға өңір тұрғындары мен облыс қонақтары, сондай-ақ туроператорлар мен туристік бизнес өкілдері қатысты.
Іс-шара аясында қонақтарға аниматорлардың қатысуымен ойын-сауық бағдарламасы ұйымдастырылды. Мәдени бөлімде бүркітпен көрсетілімдер мен тазы иттерінің ұлттық тұқымын таныстыру рәсімі өткізілді. Қатысушыларға ыңғайлы жағдай жасау мақсатында ыстық тамақ, ыстық шай, бауырсақ ұсынылды, сондай-ақ жылыну пункті жұмыс істеді.
Павлодар облысы туристік салада тұрақты дамып келеді. Өңірде 151 орналастыру объектісі жұмыс істейді, олардың жалпы сыйымдылығы 10 мыңнан астам орын. Сондай-ақ облыста 7 туроператор және 192 туристік агент қызмет көрсетеді. Биылғы қаңтар-қараша аралығында туристік қызметтердің көлемі өткен жылдың сәйкес кезеңімен салыстырғанда 28% өскен. Туристік ағын 243 мыңнан астам адамға жетіп, олардың 236 мыңы ішкі туристер болды.
