Қазақстан мен Кувейт туризм саласындағы ынтымақтастықты нығайтты

ҚР Кувейт Мемлекетіндегі Елшілігі Қазақстанның туристік әлеуетін ілгерілетуге арналған «дөңгелек үстел» ұйымдастырды, деп хабарлайды Travelpress.kz.

Шараға Кувейт беделді туристік компаниялары мен жетекші БАҚ өкілдері, сондай-ақ «Jazeera Airways» авиакомпаниясының өкілі қатысты.

Іс-шара барысында Қазақстанның Кувейттегі Елшісі Азамат Бердібай еліміздің туристік бағыт ретіндегі әлеуеті туралы айтып, Қазақстанның әрбір өңірінде және шетелдік туристке баруға тұрарлық табиғи көрікті жерлерге егжей-тегжейлі тоқталды.

Қазақ дипломаты өз сөзінде Қазақстан мен Кувейт географиялық қашықтыққа қарамастан туристік салада өзара қызығушылық танытатынын атап өтті. Азамат Бердібай Парсы шығанағы елдері туристердің Қазақстанға деген қызығушылығының артқанын атап өтті.

Бұдан басқа, «дөңгелек үстелге» қатысушылар Қазақстанның әлемнің 80-нен астам елінің азаматтары үшін, оның ішінде Кувейт Мемлекетінің азаматтары үшін визасыз режим ұсынатыны туралы хабардар етілді. «Jazeera Airways» авиакомпаниясы жүзеге асыратын Алматы және Әл-Кувейт қалалары арасындағы тікелей әуе рейстері мыңдаған кувейттіктерге елімізге келуге мүмкіндік береді.

Іс-шара аясында қонақтарға Қазақстанға баруды жоспарлап отырған туристерге арналған «Kazakhstan.travel» портал көрсетілді.

«Дөңгелек үстел» қорытындысы бойынша Қазақстандық туристік қауымдастығы мен Кувейт саяхат қауымдастығы арасындағы ынтымақтастық туралы Меморандумға қол қою туралы уағдаластыққа қол жеткізілді.