Бүгінде ол шағын және орта бизнесті дамытудың бастауы саналып, одан әрі өсуінің драйверіне айналды.
Марқакөл көлінде бірегей халықаралық туристік жобаны жүзеге асыру жоспарланып отыр. ШҰАА-дағы Қанас және Шығыс Қазақстан облысындағы Марқакөл көлдерін бір туристік бағытпен байланыстыру көзделуде. Қазіргі таңда ҚХР Шыңжаң-Ұйғыр автономиялық ауданындағы Қанас көліне жыл сайын келетін ішкі туристер саны 10 миллионнан асады.
Оның жер бедері мен табиғаты Марқакөл көлімен ұқсас келеді. Бірақ Шығыс Қазақстандағы көл одан бірнеше есе үлкен. Сондықтан оның туристік әлеуеті де жоғары. Өкінішке қарай, Марқакөлде әлі қажетті инфрақұрылым жоқ. Дегенмен табысты жұмыс істеп тұрған туристік жобамен байланыс орнату келушілер санын арттыруға үлес қосатын болады.
Жобаның бірегейлігінің арқасында мыңдаған туристі тартуға мүмкіндік туады. Қазір Теректі ауылы маңында жаңа шекара өткелін ашып, көлге тікелей жол салу мәселелері талқылануда, - деді Шығыс Қазақстан облысының әкімі Ермек Көшербаев Өңірлік коммуникациялар қызметі алаңында өткен брифингте.
Соңғы бірнеше жылдың ішінде аймақта туризмді дамыту бойынша ауқымды жұмыстар атқарылып келе жатқанын айта кеткен жөн. Инфрақұрылымды дамытудан бөлек, қызмет көрсету саласындағы кәсіпкерлер үшін туристерді қарсы алу және ас мәзірін дайындау бойынша курстар ұйымдастырылады.
«Шығыс салбурыны», «Altay Fest» сынды брендтік іс-шаралар Шығыс Қазақстанның туризм индустриясының жарқын бейнесіне айналуда.
Катонқарағай мен Зайсанда әуежайлардың салынуы да Шығыс Қазақстанның бірнеше ауданында туризмнің дамуына оң әсер ететіні сөзсіз. Қазіргі таңда құрылыс орындары белгілі болды. Әуежайды салу жұмыстары келесі жылы басталады.
