фото Солтан Жексенбеков
Қазақстан мен Өзбекстанның бастамасымен ғарыштық және индустриялық туризмді дамытуға бағытталған жаңа бірлескен туристік маршрутты іске қосу мәселесі қарастырылуда.
Қазақстан тарапы Өзбекстанның туристік сала өкілдері мен кәсіпкерлер қауымдастығына ынтымақтастық туралы ұсыныс жасап, Қызылорда облысының туристік әлеуетін ашуға баса назар аударды.
Бастаманың негізгі элементі - Қызылорда облысының аумағында орналасқан Байқоңыр ғарыш айлағына барумен байланысты бірлескен туристік жобаларды қалыптастыру.
Ұсынылып отырған маршрут «Союз» зымыран-тасығышын құрастыру және сынақтан өткізу жұмыстарына куә болуға, зымыранды тасымалдау және ұшыру кешеніне орнату кезеңдерін тамашалауға, ғарыш айлағындағы музейлер мен тарихи нысандарды аралауға, сондай-ақ белгіленген күндері зымыранның ұшырылуын тікелей бақылауға мүмкіндік береді.
Жыл ішінде Байқоңырда ғарыш зымырандарын ұшыру бірнеше рет жүзеге асырылатыны атап өтілді. Алайда мұндай іс-шараларға қатысу алдын ала тіркелу шартымен ғана мүмкін болады.
Қазақстан тарапы Өзбекстанның туроператорларымен бірлесіп аралас туристік пакеттер қалыптастыруға, ғарыштық және индустриялық туризм бағыттарын дамытуға және осылайша Қазақстан мен Өзбекстан арасындағы туристік алмасуды кеңейтуге дайын екенін мәлімдеді.
Ең жақын практикалық қадам ретінде 20 наурыз бен 26 сәуір аралығына жоспарланған туристік іс-шара қарастырылуда.
Туристік сала кәсіпкерлері мен туроператорлары жаңа маршрут аясындағы ынтымақтастық бойынша бастамалар мен ұсыныстар енгізуге шақырылады. Бұл жоба екіжақты туристік өзара іс-қимылдың қосымша драйверіне айналады деп күтілуде.
