Фото: Pixabay.com
2026 жылдың 1 наурызынан бастап Мысыр туристік визаларға арналған визалық алымды 25 доллардан 30 долларға дейін арттырады. Жаңартылған тариф елдің барлық шекаралық өткізу бекеттерінде күшіне енеді, деп хабарлайды Travellpress.kz kaz.inform.kz. сілтемесімен.
Мысыр туристік компаниялар мен агенттіктер палатасы өз мүшелеріне қабылданған шешім жөнінде ресми түрде хабарлама таратты. Туроператорлар мен олардың заңды өкілдеріне жолданған хатта визалық алымның өсуі елге кіру рәсімдерін жетілдірумен байланысты екені көрсетілген.
Палатаның атқарушы директоры Осама Амара жаңа тарифтің бекітілгенін және белгіленген күннен бастап барлық бақылау-өткізу бекеттерінде міндетті түрде қолданылатынын мәлімдеді.
Туристік компанияларға бағдарламаларды алдын ала жаңартып, халықаралық серіктестерімен өзгерістерді келісу ұсынылды. Бұл сапарларды ұйымдастыру кезінде түсінбеушіліктердің алдын алуға мүмкіндік береді. Сондай-ақ көктем мезгілінде туристік ағынның дәстүрлі түрде артатынын және Мысырға сұраныстың жоғары екенін ескере отырып, клиенттерге жаңа бағалар туралы дер кезінде хабарлау қажеттігі айтылды.
Мысырдың туризм саласы өкілдері бұл бастама секторды дамытуға, әуежай инфрақұрылымын жаңартуға және қызмет көрсету деңгейін көтеруге бағытталған кешенді саясаттың бір бөлігі екенін атап өтті. Сонымен қатар билік электронды виза жүйесін кеңейтіп, әуежайлардың өткізу мүмкіндігін арттыру жұмыстарын жалғастырып жатыр.
Айта кетейік, бұған дейін Мысыр аумағынан 10 мың жыл бұрынғы тастар арасынан табылған көне баспана туралы хабарланған болатын.