Швейцария мен Сауд Арабиясы Дүниежүзілік көшпенділер ойындарына қатысады

Қазақстанның Сауд Арабиясындағы Елшісі Мадияр Меңілбеков Сауд Арабиясының Спорт вице-министрі Бадер әл Кадимен кездесу өткізді, деп хабарлайды Travelpress.kz.

Кездесу барысында тараптар Қазақстан мен Сауд Арабиясы арасындағы спорт саласындағы ынтымақтастықты нығайту перспективаларын талқылады.

Мадияр Меңілбеков Қазақстанның спорттық жетістіктерін айта отырып, жақында Ар-Риядта өткен киокушин каратэден Азия чемпионатындағы соңғы жетістіктерін атап өтті, онда қазақстандық спортшылар 15 елден келген қатысушылар арасында бірінші орынды иеленді.

Сонымен қатар қазақ дипломаты сұхбаттасын ҚР Президенті Қасым-Жомарт Тоқаевтың «Әділетті Қазақстан: заң мен тәртіп, экономикалық өсім, қоғамдық оптимизм» атты Қазақстан халқына жолдауының негізгі баптарымен таныстырып, жолдауда көрсетілген экономикалық реформалар мен жаңа бағытына, индустрияландыруға, әртараптандыруға бағытталған кешенді жоспар, сондай-ақ басқару жүйесіндегі ашықтық пен әділеттілік оның негізгі құрамы болатынын атап өтті.

Бадер әл Кади сұхбаттасын тыңдап, Қазақстан Президентінің жолдауында айтылған бастамалардың еліміздің дамуын қамтамасыз ету үшін маңыздылығын атап өтті.

Сондай-ақ қазақ дипломаты Сауд Арабиясының Спорт министріне 8-13 қыркүйек аралығында Астанада өтетін V Дүниежүзілік көшпенділер ойындарына қатысуға шақыруды тапсырды. Ол жарысқа әлемнің ондаған елдерінің өкілдері қатысатынын және ойындар аясында спорттың 20 жарыс және 10 көрме түрінен жарыстар өткізу жоспарланғанын жеткізді.

Вице-министр шақыру үшін алғысын білдіріп, Сауд Арабиясының V Дүниежүзілік көшпенділер ойындарына қатысатындығын растады.

Сонымен қатар Қазақстанның Швейцариядағы Елшісі Қайрат Саржанов алдағы уақытта Қазақстанда өтетін Дүниежүзілік көшпенділер ойындарына қатысатын швейцариялық спортшы Андри Маруггпен кездесті. Швейцариялық атлет «Жамбы ату» сайысында, соның ішінде атпен шауып келе жатып нысанаға садақ атуды қамтитын «мажар стилінде» бақ сынайтын болады.

Жарысқа дайындық аясында Қазақстан Елшісі швейцариялық спортшының ойындарға қатысуының маңыздылығын және бұл спорттық шараның халықтар арасындағы мәдени байланыстарды нығайтудағы рөлін атап өтті.

Өз кезегінде Андри Маругг Қазақстан тарапына шақыру мен ойындарды ұйымдастырғаны үшін алғысын білдіріп, көшпенділер мәдениетінің бай мұрасы мен дәстүрлеріне деген шынайы қызығушылығын жеткізді.

Қазақстан Мәдениет және спорт министрлігі, ЮНЕСКО және Түркі мемлекеттері ұйымы 2024 жылғы 8-13 қыркүйек аралығында Астанада ұйымдастыратын Бесінші Дүниежүзілік көшпенділер ойындары «Ұлы дала дүбірі» ұранымен өтеді және этноспорттық және этномәдени қозғалысты дамытуға бағытталған. Елорданың басты спорт ареналарында ат жарысы, күрес, зияткерлік ойындар, жекпе-жек өнерлері, садақ ату және құсбегілік сияқты 21 спорт түрінен жарыстар өтеді.