Осыған байланысты елорданың бас мемлекеттік санитар дәрігері Сархат Бейсенова қала тұрғындарына үндеу жасады. Елорданың коммуникациялар қызметінде өткен брифингте Сархат Бейсенова жылдың жылы мезгілінде жіті ішек инфекцияларының пайда болу қаупі артып келе жатқанын еске салды.
«Жазғы уақыттағы белсенділік ашық су айдындарында шомылумен және жемістердің пісуімен байланысты. Ішек инфекцияларының алдын алу мақсатында қарапайым ережелерді сақтауға шақырамын», - деді санитар дәрігер.
Ол бірнеше негізгі ережелерді атап өтті:
- ішу үшін тек қайнатылған немесе бөтелкедегі суды қолдану;
- жеке және қоғамдық гигиена ережелерін қатаң сақтау;
- жемістер мен көкөністерді жемес бұрын оларды мұқият жуу керек;
- тек ресми рұқсат етілген жерлерде суға түсу, шомылу кезінде суды жұтып қоймауға тырысу;
- жеке тұлғалардан, сауда үшін белгіленбеген орындардан азық-түлік сатып алмау;
- аурудың алғашқы белгілерінде өзін-өзі емдемей, дереу медициналық көмекке жүгіну керек.
