Алматы шетелдік туристер үшін тартымды бағыт болып қала береді, деп хабарлайды Travelpress.kz.
Mastercard деректеріне сәйкес, 2025 жылғы қаңтар–қараша айларында шетелден келген қонақтар қала мен өңірдің ең танымал орындарына жиі барған. Ең көп баратын орындар қатарында: «Шымбұлақ» (30,6%), Үлкен Алматы көлі (7,8%), Медеу (6,2%), MEGA сауда-ойын-сауық орталығы (5,5%), Арбат жүргіншілер аймағы (4,6%), Шарын шатқалы (4,35%), Орталық саябақ (4,35%) және Көлсай көлі (3,9%) бар.
Туристер тарихи-мәдени және рухани нысандарға да айрықша қызығушылық танытады. Атап айтқанда: Көктөбе (12,8%), Вознесенск шіркеуі (12%), Қазақстан Республикасының Орталық мемлекеттік музейі (7,2%), Көк базар (6,4%), Тұңғыш Президент саябағы (4%), Ықылас атындағы музей (4%) және Алматының орталық мешіті (3,2%).
Алматы таулары туристерді тартатын басты табиғи артықшылық болып отыр.
Тау инфрақұрылымын дамыту, соның ішінде «Шымбұлақ» пен «Ой-Қарағай» курорттарын арқан жолдар мен жүргінші бағыттары арқылы біріктіру, туристік ағындарды тиімді бөлуге, сондай-ақ демалыстың қауіпсіздігі мен қолайлылығын арттыруға мүмкіндік береді.
Бірегей табиғаты мен бай мәдени мұрасының арқасында Алматы заманауи туристік орталық ретіндегі халықаралық тартымдылығын жүйелі түрде нығайтып келеді.